قلب أبيض لون جدارك
عاش..ماعاش..ميّت يجوز
أصله عاصر يوم حصارك
عاش بيحلم بالغموس
قلب نادي
من ولادي
شاب يمكن او عجوز
ما الشباب في عيون بلادي
كنز بالي من الكنوز
والكنوز يابهيّه يامّا
لو فاتوها تصير تراب
أمّا بالك يا ام ذمّه
لو ترابك كان شباب؟!؟
…الخلاصه
كان في باله يابهيّه
يبقى أب عيال لطاف
يسقوا شوقه
يجروا فوقه
ينزف الدم ف عروقه
لجل لا يفوتهم عجاف
مش بقولك يابهيّه
إن اولادك نضاف؟
…المتمّه
ولده فاته
قبل مايبدأ حياته
شق عوده كلاب سجون
ربّى فيهم من عضامنا
باشـ مغسّل مال قارون
آه ياجامعه عضامنا يامّا
آه ياراميانه فـ حناك
زرت قبرك غصب عني
شفت إسمك من هناك
واقفه ع الشاهد بتقري
ع اللي كان أجره الهلاك
اسجنينا
وإدفنينا
نزّلي دموعك علينا
وإوعي تنسي يابهيّه
بالمراحم
تدعي لينا
بس إوعي تقولي إنك
ع المحبه
ربيتينا
إدفنينا
وإدفني حلمك معانا
إقري سوره
أو رساله
إجمعي قوم الجهاله
يهروا بدنك بالقواله
ان لجل الحب يامّا بتسجنينا
بس اوعي تقولي إنك
حبيتينا
وإنسي كدبة ان فيكي
م المذاهب حبتين
حبوا فيكي ان ليكي
م التسامح وردتين
وان فيكي يا بهيّه
الف شكل والف لون
دانتي رد الصدق فيكي
جثه هامده في السجون
ده اللي هان على بلده دمّه
بُكره بلده عليه تهون
واللي صانك
ونسيتيله
عمره مره ف يوم يصون؟
Autor: مايكل عادل
