ناس بتعيش علشان حاجة وناس بتموت علشان حاجة وناس بتموت على الحاجة
وناس تديلك الحاجه وهى ليها محتاجه وناس تديلك الحاجه و تاخد قصادها ميت حاجه
وناس تكبر تكون حاجه و ناس تصغر علشان حاجه
Stichwörter: شعر-عامية
وصية سيد حجاب
ولما أموت
لو مت ع السرير ابقوا احرقوا الجسد
ونطوروا رمادى ع البيوت
وشوية لبيوت البلد
وشوية ترموهم على تانيس
وشوية حطوهم فى إيد ولد
ولد أكون بُسُته .. ولا أعرفوش
ولو أموت ..
قتيل – وانا من فتحة الهويس بافوت -
ابقوا اعملوا من الدما حنة
وحنوا بيها كفوف عريس
وهلال على مدنة
ونقرشوا بدمى
- على حيطان بيت نوبى تحت النيل –
اسمى
Stichwörter: شعر-عامية
أنا عندي سؤال سفيه
حبيني وفلسفيه
لو إن الدنيا فيها
شيء غير اللي إحنا فيه
في الطريق
أربع عساكر جبابرة يفتحوا برلين
ساحبين بتاعة حلاوة جاية من شربين
شايله على كتفها عيل عنيه وارمين
و الصاج على مخها يرقص شمال و يمين
إيه الحكايةيا بيه ؟ جال خالفت الجوانين ؟
إشمعنى مليون حرامى فى البلد سارحين
يمزعوا فى الجيوب و يفتحوا الدكاكين ؟
أسأل وزير الشئون و لا أكلم مين
Stichwörter: شعر-عامية
احب بنت البلد والحب بهدلني
ومن بروج الأدب والفن نزّلني
احب عوجه لئيمه اشتكي للّه
من غلبي منها وتشكي غلبها مني
جاهله اذا تفرّجت في جنينة الحيوان
تقول على النمر قطه والوعول خرفان
وتقول على البنك سيما والبلوز فستان
لكن يصيبني البكم لما تجادلني
جبانه تصرخ من النمله بعزم الصوت
والبورص طلّع عليها عزرائيل الموت
لكن يفوت رمش عينها من فؤادي فوت
ان كنت ميت قتيل هوهّ اللي قاتلني
راكبه على الكارو تتسامر مع الحمار
والشمس فوق جسمها تشعل وتقدح نار
ولما يوم ينتظرها ابن الذوات ببكار
تقول له روّح على امك وابقى قابلني
احب بنت البلد من فرط خفتها
هوليود على بدعها ما تجيبش عصبتها
ولا بنات لندره تتلف لفتها
أدي اللي جاب لي البلا أدي اللي هابلني
Stichwörter: شعر-عامية
ده كله شغل يهود يا مصر في الضلمة ... ديابة سارحة ورا ولادك بقالها سنين
تعابين في برج حمام لكن البلد نايمة ... يعني مش غريبة نبقى منكوسين
Stichwörter: شعر-عامية
يا مصرى هم وصحى النوم واقرا الاخبار
الدنيا صحيت الا احنا كدا بالمندار
شوف الصهاينه على ترابنا واقفين زنهار
حلاوتها ماتشات الكوره على خط النار
يانكسه جايه أُوف سايت ناموا الحكام
Stichwörter: شعر-عامية
تسرق شلن تبقى هيصه وبلوه وجَرِيمَه
تسرق أُلوف الأُلوف تبقى م الابطال
وكل ما السرقه تكبر .. القانون سيما
وكل ما السرقه تصغر .. فيه حرام وحلال
Stichwörter: شعر-عامية
خطط وخيط وعلم .. يا شعب يا معلم
يا شعب يا مبلّم .. يا ساكت اتكلم
Stichwörter: شعر-عامية
لا تصمت أبدا .. إن الصمت جهاله ..
واحذر أن تتكلم فى الموضوع ..
لا موضوع هنالك ..
إن الفلك اليوم عطاره ..
كن فيهم «خضر العطار» !.
لكن خذ سمت الأستاذ ..
وحذار أن تنسى «البايب» ..
والكلمات «الخرز» اللاتينية !
قل «فى الواقع » .. واصمت لحظة !
قل «لاشك» ..
واصمت لحظة !.
ثم مقدمة محفوظة ..
من فذلكة «المنهج» ..
حسب الموجة والتيار..
فالبحر سباق ..
والموجات الوف ..
«الموجه تجرى ورا الموجه ..
عايزة تطولها ! »
عجل واركب أية موجه ..
فالأيام دول ..
ويل للبسطاء ذوى القلب الأبيض ..
حين تفاجئهم أنواء الطقس ..
الناس إثنان ..
أحدهما ينجو فى الطوفان ..
والآخر يغرق فى كأس ..
«إنى أغرق ..
أغرق .. أغرق ! »
Stichwörter: شعر-عامية
Seite 1 von 4.
nächste letzte »
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.