الرسايل اللي بتتكتب ومابتتبعتش وبتفضل متعلقة في مساحة خاصة في أيامك ،، تتراجع وتتعدل وتفضل محفوظة على جنب ..

والرسايل اللي بتجيلك شجاعة أنك تبعتها أخيرًا ولسبب خارج عن إرادتك مابتوصلش ..

والرسايل اللي بتندم بعد ما بعتها لما تقرأها لأنك كتبتها في وقت ضعف مكنش يصح تعري روحك فيه زي كده ..

والرسايل اللي ياما طلبتها ومجتلكش مش لأنك متستاهلهاش بس لأنك مستنيها من حد ماينفعش يبعتهالك لأنه لو بعتها لسبب خارج عن إراته مش هتوصلك ..

والرسايل اللي بتتكتب في وقت لخبطة فتطلع مش مفهومة ومحتاجة لحد روحه تشبه روحك عشان يقدر يستوعب الجمل اللي تبان غريبة جدًا لأي حد غيره ..

والرسايل اللي وصلت ومركونة لأن مفيش قوة كافية أنك تقرأ ايه موجود فيها ..

أو الرسايل اللي تقرأها وتبقى كأن حد فوقك من حاجة واهم نفسك بيها أو حد وداك لسكة كنت بتتجنب تمشي فيها وعامل نفسك مش شايفها ..

الرسايل اللي بتتمناها وبتلاقيها بعد ما يعدي وقتها المظبوط أو تبعتها لحد كان بيتمناها بردو بعد ما يعدي وقت التمنى والقبول ..

Author: ساره عاشور