كنت بحلم يوم بحب
يعدي بيا السبع سماوات
من غير تمن
من غير مقاس
من غير أنا
مبيوزنش التضحيات
احط قلبي وسط ألف قلب
تعرفيه وبدون علامات
كنت بحلم
كنت بحلم يوم ف ضيقتي
ألاقي ايدك تسندنى من الوقعات
بس عادي أنا برضه راجل
وعليا الاستحمالات
وتيجي ضيقتك
ابقي ابوكي وابقي اخوكي
وابقي وابقي
زي ما تعوزنى الحاجات
والآلام والأزمات
وتيجي من تانى ضيقتي
وألف ايد تطبطب الا ايدك
والف شخص بحنية يركن
بقي قلبي ولا الجراجات
الي يطيب والي يساعد
والي يقوي والي يساند
وقلبي للهوا مصدات
اختارك انتي
حبك انتي حب ميتفهمشي
ولسه بتسألي السؤالات
بس العجيب مستكترة
آهة من الطعنات
ويا ريتها آهة مصرخة
دي آه مكتومة من سكات
صوتها اتنبح
شوقها اندبح
اهة مستخبية ف الأبيات
مستكترة أداوى روحي
اطيب جروحي
عشان افوقلك
تطعنى براحتك
وتعرفي قلبي
من العلامات
والي كنت عاوز افهمه
الحيرة والاستغرابات
علي كل وشوش البنات
لما اعمل حكايتي قصة
مستخبية في الأبيات
ويقولولي ده ضعيف
أو ميزان عقله خفيف
محدش قال راجل عفيف
فاهم معنى شريكة حياة
ما اصل الثقافة اتغيرت
وبقي كتر البنات ع الرف جاه
واتنسي عنتر زمانه
والنواهل والناقات
واتنست قطز حياته
وحكاياته
واشواق منه لجهاد
ومهما برضه اتغيرت
واتبدلت واتشقلبت
والثقافة استعبطت
معلش حبي ميتفهمشي
قدم بقي شوية رفات
شاخ وعجز يا ستي
رغم صغري
شكلي م الجيل الي فات
وادي حب افلاطونى
وعم افلاطونى مات
Author: عمر حسني جبريل
