قَبلِك حَياتى ماعِشتهَاش
عَدّت عليا سنين كتير ماحسبتهاش
وحاجات كتير ضاعت عشان مافهمتهاش
وقلت سِيبها لوقتها
أحلام كتير أجّلتها
وكنت دايما أقولّها
استحملى
لسه أوانك ماابتداش
عِشت الحياة طيب أوى
وحسبتها بورقة وقلم
كُنت عَامل ألف خاطر للحياة
للناس وشكلى ومظهرى
ايه اللى لازم تعمله وماتعملوش
ازاى أجارى الناس فـ تركيب الوُشوش
كُنت فاكر إنى صح
بس اكتشفت مؤخرا
إنى بعد العمر دا
عملت ياما حساب لناس ماعرفتهاش
وزرعت جُوايا بُذور لصفات كتير مابحبهاش
وخِسرت أجمل حاجة ليا فـ الوجود
خسرت نفسى :(
عملت بينى وبين حياتى سُدود
لما دخلتى دنيتى
حَسيت كأنى رجعت تانى للحياة
وقلبى م الفرحة كسر كل القيود
قيود كتير حبسته بيها
ومن يوميها
وهو خاصم فرحتى
لكن خلاص أقدر أقول
ان اللى عاش طُول عُمره خَايف م الحياة
دلوقتى بيحب الحياة~ :)
Auteur: Ahmed Faiad
