يا كُل العِمالة و يا شقيانين
يا عاطل و باطل في وطنك سجين
تخافوا هاتشقوا
تثوروا هاتبقوا
و أخيراً هاتلقوا النهار له عينين
لو يطول الليل في قلبك و انتظارك ليها زاد
و انشغالك غصب عنك حط قلبك في المزاد
و انكسارك جوة حلمك
داب في بحر من الفساد
هاتناديها و هي دايماً هاتلاقيها في المعاد
يا واهب الطير الجناح
يعلى بعيد
عن فـَرشته
و يطير سعيد
من غـُربته
و يعود عنيد
على عشّته
إوهب لقلبي من البراح
اللي يفيد
حرّيته
حبّة تُراب
جوّة البشر
يتلملموا جوّة القلوب
تصبح حـَجَر
مليان ذنوب
ناسي بإنه فـ يوم قـَدَر
راجع يكون
حبّة تراب
واحد أحد
خالق قدير
ربّي الصـَمَد
عاطي الفقير
أكبر مدد
رزقك كتير
هـِبني البصيرة اني ألمحه
و بمطرحه
أبقى جدير
مطلوب اكون حاجه
و انا نفسي أبقى حاجات
و الدنيا محتاجه
لقرود و بهلوانات
تعرف تنُط لفوق
تسرق بكُل الذوق
تقتل قتيل, و يفوق
و قلوب بلا دقّات
اللعبه فيها الدور
يفرق كتير لو فات
و ان جبت هاي سكور
راح تتغِلِب أوقات
في المستوى الأصعب
إلعب كتير و اتعب
أصل الحياه ملعب
و اللعب فيه ليفيلات
و لو ليا نصيب فرحة
بلاش بعده تبكّيني
يارب دموعي على غفلة
بتجرحلي جفون عيني
ياللي خَلَقت الناس
يعطوا الحياة مَلمَس
و اتفرّقوا ع اللون
و الأكل و المـَلبـَس
ردّيت بـ " و اعتَصِمُوا
سمعوها و انقَسَموا
و كإنهم قَسَموا
الخَيرُ ما يَلبَث
و خلقتلي النسمات
حررتـني مسافات
قاللي اللئيم هَيهَات
و انفاسي راح يحبـِس
ماتصدّقوش لمّا الذنوب تكتر عليكم
إنها
طالت عنان المُنتهى
ربّك غفور
رحمَن صبور
ياما كتير راح يمهلك
ولا تنتظر نظرة تعاطف من بَشَر
سبّح لمولاك ان غَفَر
ولو ابتلاك
انسى بَلاك
ربّك رحيم لن يهملك
دعواتي يوم الغرّة
للواحد القهـّار
يجعل بلادي حـُرّة
في الضلمة تبقى نهار
يا عاطي عبدك صوم
عافف عن الشهوات
عايش مع المكلوم
في أحلك الأوقات
إجعل في شهر كريم
اللين لكـُل سقيم
ياللي بحالي عـَليم
و فـ يدّك الجايّات
« first previous
Page 4 of 7.
next last »
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.