مش لاقيين كلام يتقال
بعد ما كان كلامنا كتير
كان أقرب كلام ع البال
كلام طالع من غير تفكير
كلام يخلص يتعاد تانى
ودايما كل مره جديد
كلام يبدأ بــ "وحشانى"
ومابيخلصش كان بيزيد
مبقاش سهل الكلام بينا
وكل واحد بقى فى وادى
وكلامنا لو اتكلمنا
بيكون كلام عادى
نسكت أكتر ما نتكلم
وبنخبى ونتألم
ونفكر ف كلامنا عشان
دلوقت مش زى زمان
هوه صحيح البعد جفا
ومفيش محبة بعد غياب
ولا ماعدش فينا وفـا
يا دنيا مفرقه الأحباب !
مش حكاية صعبه هيا
وعشان أسهلها عليك ..
حد غيرك أولى بيا
وحد غيرى أولى بيك
أنا عمرى ما كنت وحيد
أنا دايما قلبى معايا
بحكيله كل جديد
واشكيله من جوايا
لو كل الناس نسيونى
ألاقيه بيسأل عنى
جنبى لو الكل سابونى
علشان هوه اللى فاهمنى
يمكن مش بيرد عليا
ودى مش فارقه معايا كتير
وساعات يقسى عليا شويه
بس أحسن من غيره كتير
و ف وسط الزحمة حاجات
تحصل ملهاش تفسير
غير إن ضميرنا مات
والوضع بجد خطير
زمان كنا أعز اصحاب
بقينا بنتقابل صدفه
نبص لبعض باستغراب
ونفتكر مليون ذكرى
الأصل فينا الخير
والشر مش دايم
الأصل فينا الخير
لو حتى مش باين
الأصل والثابت
ان احنا فينا حاجات
حلوه لكن تاهت
فى الزحمه والخلافات
احنا ميزتنا الاختلاف
وكل زهرة وليها لون
لو كل واحد فينا شاف
الخير ف غيره من غير ظنون
من غير كلامنا ما يبقى جارح
من غير فراق وخصام يطول
من غير خيانة عشان مصالح
ساعتها بس نقدر نقول
الأصل فينا الخير
والشر مش دايم
الأصل فينا الخير
لو حتى مش باين
سلام .. يا كل اّه محبوسة جوايا
عشان .. للعشرة بينا حد ونهاية
سلام .. مفيهوش أسى ف وداع
زمان .. قلبى اشترى واهو باع
الحزن يمكن دى تكون البداية
« ; premier précédent
Page 5 de 5.
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.