أعيش فيكى
أموت م الجوع
أموت فيكى
أعيش موجوع
البرد ساكن وسطهم
و مقسطين حق الغطا
و مغصوبين ع الشعبطة
و بيرسمو الاولاد أمل
و الرسمة تطلع ... شخبطة
أيه الجديد ؟
الطير جناحه بيتربط لسه فى حديد
لسه العبيد عايشين عبيد بالاقتناع
كل اللى فاضل يعلنوها على المشاع
ان اللى خان كان مشترى
وان اللى مات هو اللى باع
بالذمة مين المستفيد
فرعون جديد
وللا اللى فات هو الملك
وللا احنا شعب بزمبلك
يؤمر نطيع
يشخط نبيع
معقول يكون لسه القطيع.. عايشين قطيع
وفرحانين بالمألسه والابلسه والملعنه
معقول تكون لسه الامانى
رغم اللى كان مش ممكنة ؟؟
كرسى البلد ميشيلش أى إله
و ازاى يا خلق الله
خِّروا له سُجدا
كافر انا بربكم
ولا كنت مستعبدا
مؤمن بواحد احد
ما نسانى يا ناسيين
بسجد لعادل أمر
بالعدل يا عاصيين
يوماتى اتوضا من نيلها
و اصلى للى جمّلها
و أدعيلها يكملها
بواحد يمسك المايلة و يعدلها
النهار قرب و لكن
عايز اللى ينادى ليه
ده السكوت ع الظلم عورة
و اللى يعمل نص ثورة
"يحفر القبر بإيديه
ملعوب بينا و بيكى
ملعوب معمول عليكى
مابقاش فى اللعبة سر
قوانين اللعبة فيكى
الظالم مستمر
الدنيا رحلة وجع
ضحكة على أستحياء
الدنيا داء و الدوا
فى روشتة استغناء
الدنيا حقنة أمل .. بتخدرك حبِّة
لكن ماهيش حابة
يبقى بينكو وفاق
كل الليالى شتا
لما الدموع تكتر
و العمر مستكتر يعدلك الكفة
بردان و ليه رايح بالبرد تتدفى
ده انت الجراح لازمتك
ليه منها بتقرب
إنت اللى راح أزمتك
و العمر متغرب
ده الدمع ملّ العين
طب اقولك اسأل مين
و انت اللى بتجرب
قلبى تايه فيكى لكن..
انتى مش تايهه ف ضلوعى...
ياللى حبك فيا ساكن..
جنب ضعفى وجنب جوعى
طول ما طعم الخوف فى قوتى
يبقى هيطوّل سكوتى
واما يرجع ليا صوتى
تبقى دى بداية رجوعى
اه بحبك وانتى عارفة
ان حبك فرض عندى
بس لسه عيونى شايفة
ناس بتزرع فيكى خوف
اوعى تبقى ف لحظة خايفة
ارفضى ظلمك وعاندى
مهما رسمو ف صورة زايفة
غير حقيقتك مش هاشوف
ايدى فى ايديكى وتعالى
نزرع النور فى الليالى
رجعى الحلم لخيالى
وامسحى بايدك دموعى
قلبى تايه فيكى لكن
انتى مش تايهه ف ضلوعى
....
ضلموكى و سرقو نورك
أخدو منك كل شئ
سجنو حلمك علـّو سورك
علمو الخوف للولاد
الامل محتاج يزورك
يبقى جنبك فى الطريق
بكره يرجع ليكى دورك
ترجعى ست البلاد
ايدى فى ايديكى وتعالى
نزرع النور فى الليالى
رجعى الحلم لخيالى
وامسحى بايدك دموعى
قلبى تايه فيكى لكن
انتى مش تايهه ف ضلوعى
« ; premier précédent
Page 5 de 9.
suivant dernier » ;
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.