الحزن مربع ع السفرة
وبيغمس ف الحلم البايت
والهم بيخرج م التلاجة
وأوض النوم وبخار العيش
وأيدين العتمة مغمية على عيون الشيش
وأنا واقف على نفس مكاني
فى أبراج الصمت
تتصور..... أنامتصورتش من مدة
علشان النظرة اللى في صورتى مبتريحنيش
تتصور.... أنامتكلمتش من مدة
علشان النبرة اللى في صوتى مبتطمنيش
وأنا زى مفيش رافض نفسه
متحامل جداً على نفسه
بيخاف ليجيله اللى في نفسه وبيخاف ميجيش
خروج الكلمة من قلبي على لسانك
ربيع أول
خروج الكلمة من قلبك على لساني
ربيع تانى
خروج الكلمة ع العالم
شموع بتحنى ضفايرها
مظاهر صعب تأويلها
خطوط بيضة وخطوط سودة
مكاحل عشق مفقودة
وبين الخرجة والعودة
مساحة كبيرة للتفكير
دخان سجاير لفها الشياطين
والقلب طعم لمخلوقات الليل
دلوقتى بس عنيه جت فى عنيه
يا شعر عايز منى ايه تانى
اجمل نجوم السما
نزل ف ايدي اليمين
حسيت براءته ف كفي
ونوره على وشي
غمّضت عينى ..انما
روِض خيالى الشوف
النظارة السودة
القلب المتقفل دايما
بالأرقام السرية
العطر حيادى الأحساس
أنا دلوقتى
مسلح جدا
ممكن أواجه كل الناس
الأوضه كانت ضلمه كحل
وانا كنت اغمق ركن ف الضلمة
رغم المهدئ..بارتعش تفكير
كانت شفايفِك نوّه
وعيونك شَبَك
يعنى الليلادى
البحر ح يبات عندنا
احتمالات التفرد فى القصيدة
تبتدى
لحظة خروجك وردة
من بين السطور
بعد ما صرَّخ اوى م الخوف
خاف ليكون الناس شايفينه
غمى مشاعره
وكرمش عينه
مثِّل أنه ما بيصَّرخش
لكن الدنيا
عشان بتخوِّف
كل الناس ..حبُّوا التمثيل
« prima precedente
Pagina 3 di 4.
prossimo ultimo »
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.