و إن كان أمل العشاق القرب ..أنا أملى فى حبك هو الحب
أحمد فؤاد نجمTag: حب أغانى الشيخ-إمام
ياويلك بصبرك
عالظالم وظلمه
في الدنيا وياويلك
من يوم الحساب
دار الفلك
فى مغزلك
طول السنين
ما أمهلك
ياناسج الروح
ف الحياة
الحب لك
والخلد لك
انت الازل
وانت الابد
والهالك
اللى يجهلك
يا شعب
يا نبض الوجود
الحكم لك
والملك لك . الملك لك . الملك لك
شقشقت و النور بشاير
زهرة الصبار يا سلمى
يا نسيم الشوق يا طاير
خد لمصر في الصبح كلمة
كل عين تعشق حليوة
و إنتي حلوة في كل عين
يا حبيبتي أنا قلبي عاشق
و اسمحيلي بكلمتين
كلمتين يا مصر يمكن
هما أخر كلمتين
حد ضامن يمشي آمن
أو مِـآمن يمشي فين
هما مين واحنا مين
هما الامر والسلاطين
هما المال والحكم معاهم
واحنا فقرا ومحكومين
حزر فزر شغل مخك
شوف مين فينا بيحكم مين
احنا مين وهما مين
احنا الفعلا البنايين
احنا السنه واحنا الفرض
احنا الناس
بالطول والعرض
من عافيتنا تقوم الارض
وعرقنا يخضر بساتين
خزر فزر شغل مخك
شوف مين فينا
بيخدم مين
هما مين واحنا مين
هما الامرا والسلاطين
هما الفيلا والعربيه
والنساوين المتنقيه.. طبعاً
حيوانات استهلاكيه
شغلتهم حشو المصارين
حزر فزر شغل مخك
شوف مين فينا بياكل مين
احنا مين وهما مين
احنا قرنفل على ياسمين
احنا الحرب حطبها ونارها
احنا الجيش اللى يحررها
واحنا الشهدا ف كل مدارها
منتصرين او منكسرين
حزر فزر شغل مخك
شوف مين فينا بيقتل مين
هما مين واحنا مين
هما الامرا والسلاطين
هما مناظر بالمزيكه
والزفه وشغل البولوتيكا
ودماغهم طبعا استيكه
بس البركه فى النياشين
حزر فزر شغل مخك
شوف مين فينا بيخدع مين
هما مين واحنا مين
هما الامرا والسلاطين
هما بيلبسوا اخر موضه
واحنا بنسكن سبعه ف اوضه
هم بياكلوا حمام وفراخ
واحنا الفول دوّخنا وداخ
هم بيمشوا بطيارات
واحنا نموت في الأوتوبيسات
هم حياتهم تمضي جميلة
هم فصيلة واحنا فصيلة
حادي يا بادي يا عبد الهادي
راح تفهم قصد الغنوة دي
لمّا الشعب يقوم وينادي
يا احنا يا هم في الدنيا دي
حزر فزر شغل مخك
شوف مين فينا حيغلب مين!!!
Tag: شعر-غنائي
قل أعوذو
مدّ بوزه
الجبان
إبن الجبانه
كَل غدانا
قام لقانا
شعب طيب
كل عشانا
1968
بكرة لما قمركو يطلع
والشمس تطلع
ونهاركو يطلع
حيقولوا كان في المكان دا ناس
فيهم طيابه
وفيهم حماس
وكانوا آخر الامر
ناس
وكان زمانهم سجون
وكانوا
مابين سجونه وأمريكانه
وبين ضباب الطريق حيارى
ماحد قادر يشوف مكانه
حتقولوا كانوا
وياما كانوا
وياما شربوا
وياما عانوا
وياما جالهم
وياما جيلهم دفع
وكان التمن أمانه
وياما ناس فى المسيره
مشيت
وناس ف نص المسيره خانوا
حتقولوا كانوا
أو ياما كانوا
لكن ح يبقى فى الأمر حاجه
إن اللى عربد
ما سابش حاجه
وساب كلابه
على كل حاجه
تهبش وتنهش
فى كل حاجه
ماقدرش يقتل فى اى حاجه
روح التفاؤل
بكل حاجه
_____________
القاهرة 1973
ويا مصر يا أول صوره
فى عيون المولودين
يا مصر يا آخر صوره
فى قلوب الميتين
يا بلدنا
يا بكره ولادنا
يام الدنيا والدين
يام الولدات المجدع
والبنتات الطعمين
يحرم اسمك علينا
ونعيش متغربين
لو سبنا الذل يدوسك
أو عشنا مغلوبين
القاهره 1967
كان مناه يلمح علامة خوف بسيطه
يطب حييجى الخوف منين ابن
العبيطه
هو مين فينا الجبان
ولا مين فينا اللى خان
إللى قلبه بالمحبه وبالأمانى
وبالربيع لاخضر مزهر
والأغانى
ولا كلب الصيد
وأسياده الأباطره
أكالين لحم البشر
فوق الصوانى؟
هو مين فينا الجبان
ولا مين فينا اللى خان
هو بص فى عينى بصه
إرتجف وف حلقه غصه
واتعوج ومال وقال
جملتين مش مفهومين
أصاله شاف صورتين جُمال
فى العيون الطيبين
مصر فى العين الشمال
وانتى فى العين اليمين
Pagina 1 di 6.
prossimo ultimo »
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.