مسألتش نفسك احنا مين ؟
اسأل عن حكاوي المجروحين
احنا فيكي يا مصر ميييييييين؟
بمليارتك الكتير
متهربة
وتلاجات السبيل
متكهربة
وأخبار السياسة
متفبركة
احنا مين؟
العلما برا متغربين
ومُفكرينّا في بلدنا متخونين
وشبابنا في العبارات متغرقين
والموهوبين والموهومين والمنداسين
علي قهاوي البطالة
المـِتشرَدين والمتبهدلين والمسحولين
في ميادين السياسة
لسه بتقول احنا مين؟
قالوا علينا الماسونية الحلزونية المتأمركة!!
مسألتش مين فتح البوابات أيام ضرب العراق؟
مين قفل معابرنا فانكتب علي الأقصي الفراق؟
اسأل هتعرف مين هما المتأمريكين ؟
الي في أحضان العدو متمرمغين !
مسألتش مين عمل البشر
حبر علي شوية ورق؟
لو مات او اتكل ، او حتي اتحرق
يبقي حي بيترزق !
في انتخابات مترستقة
مش فاكر كرامتنا الـمتبعزقة ؟
في كل أقسام البوليس من الشاويش
عشان بس نسيت البطاقة
اصل البطاقة متتنسيش؟!
ولما تقوله بس ليه ؟!
تبقي م المتهزأين المضروبين المفقودين
ولسه فيه آسف يا ريس ؟
لسه بتقوله السماح
قولي يعني إيه آسف ياريس
غير انك بتشخلعه
بعد ما طرقعلك آفاك
وتهشتكه وتبشتكه وتبغدده
بعد ما فرقعلك مناك
وتفرحه وتنعنشه
بعد ما طنشلك نداك
ولو انت منهم
عندي دي مش مشكلة
ما كل واحد حر فعلاً
فاطلبله يلا السماح
واوعي تبكي يوم ع الي راح
بس أنا حتما ولازم
هاخد بتار نار الجراح
بس طالما بتقول آسف يا ريس
قوله كمان متشكرين
علي ضربة جوية من سنين
وكمان متنساش تقول
انت بهدلتنا وسحلتنا وسرقتنا
وع القهاوي ذنبتنا
وخليت بناتنا وولادنا خدامين
اسأل ورود مفتحة
مين الي علمها الأنين
اسأل مينا وحسنين
شباب هندسة متهندسة
بقوا سيكيورتي ملقحين
اسأل وزيرتك المـعلمة
أم شهادة بوس الايادي
الي خليتوها دكتورة
عشان في الإعدادية
كانت م االمدبلرين ؟! *
لاتكونش بلدنا فلست
وبح منها الفائقين
اسأل عزك الي ذلنا
وبحديده خلانا متشردين
اسأل واليك بمبيداته
الي خلانا متسرطنين
اسأل نيلنا الي خلتنا بيه متلوثين
وبالكلي متبهدلين
اسأل يا ريس المسئولين
ليه في العسل نيمتهم وسبتهم
بكرابيجهم علينا متسلطين
مين يحاسب الوزير إلا الرئيس
مين يحاسب المفتري ويجيب حق الكفرانين
ومتقولش كان فالي قبلي فسدانين
ما الكدب لسه حرام
رغم ان ناس كتيرة كدابين
ومتقوليش مكنش فايق
ومش فاهمها يا منحنحين
يعني كان م المسطولين؟
مين عدل المادة الساتة بعد السبعين
عشان جماله
مفجر ثورة الآفاقين
عيب تقولوا اتضحك عليه
يعني كانوا ليه مستهفأين؟
مأفئفين؟
معلش لو بجاحة
ما انا قلتها من سنين
خلوا بقي الكفة معدولة
ما بجاحة ضد الظلم
إلا واسمها رجولة
ومش عشان طالبنا بحقنا
بقينا متنمردين
فانا مش آسف يا اللي اتخلعت !
ومش متشكرين
عارف أنا مواويل
وايوا جاي احكي
لا عاد نهار وليل
ولا لاقي مسبحتي
كرهت دونها الصبر
وجزعت أنا وحدي
حرام أشوف البكا
ف عنيها وعنيه
وتنسوا بكاها هي
وبكاه يتصدق ليه !
دي ست مدبوحة
م الحنية مجروحة
والتنية والتجاعيد
بتنادي بالرحمة
م الضلمة اه بتشكي
وراح خلاص الضي
عنده سنين تسعة
بس راجل ماله زي
ما راح خلاص الواد
ضاع منها عبد الحي
وابوه راجل طيب
الغيره منه تفيض
كانت معاه ملكه
في غيطه قبل البيت
بس
وآه منها دي كلمة دباحة
سوسة ومعكوسة
تقلب المعنى تعب
بعد ما كان راحة
اتوجع م الفقر
ومن طابور العيش
ومية سباق وسباق
والنتيجة مفيش
والحيلة عنده الفيرس
والأمل خفافيش
ملعون أبوه القرش
لما يبقي رمز الذل
وعشانه ابن الجامعة
يبيعلي ورد وفل
ولا بنت عفيفة
محتاجة يوم قرشين
معاها كل العلم
وتروح مكتب التخديم
ومعلشي يا بنتي الدنيا دوارة
امبارح جامعية والليلة خدامة
وتانى عشان الواد
قال أنا مسافر
وليه اقعد ساكت
لما انا قادر
ايوا انا هبعد
لاجله واتغرب
بس أشوفه سليم
في الحارة يتنطط
ولم هدومه وراح
حجز تذكرة الخط
وم المرض الحيلة مات
لحظة ما ركب القطر
والام بتصوت
يا خلق انا لوحدي
ليه في الغربه ارجع !
معدلهاش لزوم عندي
وبعد ساعتين
جالها الخبر مكسور
يا حاجة اتقلب القطر
والعامل معذور
وجوزك رجع
بس ع الخشبة جاي محمول
هو ده موال
من أول مواويل
هو دمع دمعة
وهي دمعت سيل
اوعي تصدقوا بكاه
ملعون ابوها فلوس
مين قال حسنى
ده الحسن ميعرفوش
وازاي بقي مبارك
ده البركة متجوزلوش
مش ببكي ع الي راح
بس بوعيكم
ده بكا تمساح
ويا رب يهديكم
ولو دي بجاحة
فالشتيمة مقبولة
بس تفوقوا وتخلوا
الكفة معدولة
وانا حسب ما اعرف
بجاحة ضد الظلم
يبقي اسمها رجولة
وسيعود بنا التاريخ يوما
حين يذكر اسمها
تهجر قلوبهم الصدور
فيهابها الأعداء رعبا
يختبئون أحياءً في القبور
سنكتب في التاريخ فصلا
لا تنتهي له سطور
صفحاته تمتد للسماء طولا
وعرضها عرض البحور
سنكتب فيه يوما
بأن فقرائها سكنوا القصور
بأن أحلامنا قد فاقت كل العصور
أصواتنا ستكون أسواط رعب للفاسدين
يحاول الفاسد أن يمسك مقاليدها
فبالمقدمة عليه تدور
بعزائم خلقت كي تفت الصخور
فرقت بين الاجتهاد نحو الكمال
والتكاسل عنوان القصور
رسموا لوحة فنية عظيمة
واشتروا أدواتها
بإصابات في العظام
وفقدان للعيون
وبعض الكسور
كتبوا بدمائهم مفاهيما جديدة
دماء تعذيب سالت
من طعنات خلفية
صبغت الظهور
أعلموا هيرودوت
أن مصر هبة أناس
علموا العالم كيف يثور
قهروا روسو بمفاهيمه
علموه معنى الحرية
في أيام لا شهور
أخبرونا معنى الغضب
والرحيل
والحبور
كتبوا مفاهيما من الإصرار والحرية جمعها
مهداة من الرحمن الباقي عبر الدهور
فلنكتب سويا حبيبتي
كما كتبنا بأن
مصر قاهرة الشرور
لكن أرجوكي حبيبتي
لا تكتبي
أن أباكي قتله الظالمين قهرا
بل قتل حرا
من أجل أن تحيا الزهور
Tags: رسالة-من-العالم-الآخر
يا مصريين يا طيبين
انتوا لسه مصدقين ؟
اوعوا تفكروا انه جد
ده هتلر قالها من سنين
الحكاية مش كبيرة
هما بس كلمتين
عندك صداع عندك ألم!
عندك معارضة بالملايين ؟
عندك وجع عندك أرف !
عندك شوية معتصمين
اقف وقول يا خلق هووووه
العدو جاااي الحقوووه
لموا جيشكمــ سكتووووه
فجأة تلاقي الكل خاف
فجأة تلاقي الكل كَش
ومتلاقيش عندكـ صداع
من غير ما تصرف حتي قرش
ولو لقيت بعدها المعارضة
لسه واقفة ولقلوعها فاردة ؟
قولهم وبنفس قادرة
اطلعوا من أرضي بره
مش عايزين وسطينا خونة
وبكده خلصت حكايتك
والصداع يا حبيبي راح
من غير ما تقول بس آسف
أو حتي تطلب سماح
بس نسي هتلر يقول !
إن الكلام يا إخواننا فات
أصل زمان كانت عقول
سهل تمشي من سكات
وأنا كمان يا ناس بقول
إن كلامه مش معقول
شعبنا شاف وياه عذاب
عرف وعوده ، حفظ كلامه
لما نزل فيه كتاب
دولة الـ(ا)نصاف
دولةُ الإنصافِ نحن
نَملِكُ قانوناً
لا يخدمُ العدالة
لدينا مجمعُ علماء
في عِلم الَجهَالة
يُشَرِعُ مواثيقَ الشرف
حُثَالةُ الحثالة
و الجميع بوطننا يعمل
بمهنةِ البطالة
ونُعَظِمُ الشُرَفَاء
بقراراتِ الإقَالة
دولة الـ(إ)نصاف نحن
بلا همزة (إ)عالة
لكننا نَملِك همزةً
فوق عنوان المقالة!
الأمن ، هرب وانسحب
وجيشي ، للبوابات فتح !
قولي لينا مين ؟
ومين يمنع دماغي تتفتح !
قال إيه شعب مؤيد ، ده فيه سلاح وخيول !
فهمني ، وعيني ، ما أنا برضه مش مسطول
طب فين بس الأمن يا سيادة المسئول
تعالى بره القصر وقولي يا معزول
حاطط في ودنك قطن ولا الدي جي معمول؟
عايز هموم شعبك ، صفحة ومش تطول
قال ده مدير مكتبك ، ما تقوله : "مش معقول"
اطلع فـ يوم كدبه ، ما الكدب بقي ببلاش
ما هو مش عشان كرسي ، بقيت علينا ملك
ما الملك مش أبدي ، إلا لرب العرش
وقبل ما تفتي ، انت ملك علي مين؟
ولا بلاش قولي ، وديت فلوسنا فين ؟
فاكرين تصدير الغاز ولا بقيتوا ناسيين؟
لما باعوه لعدو واحنا له عايزين
الشعب هو الملك مهما صبرنا سنين
وجاي في آخر يوم بعد سنين تلاتين
بتقولي هحاورلك كل المعارضين ؟
بس ليه يقبلوا وشبابنا مش راضيين ؟
وحتي لو قبلوا أنا عندي بس سؤال
مين قوم المظاهرة ومين عملكوا رجال؟
ولو انتوا قادتنا ، احنا عملناكم
وزي ما جينا ، حيينا ، ورفعناكم
سهل أوي ، نخلي الأرض تعلاكم
ده شعبي سف التراب والذل مع سيادتك
وبرضه وقف صابر ، راضي بإرادتك
معلش دي أزمة ، فبرقابينا ضفرك ؟!
غليت رغيف العيش ، فقالوا مسموح لك
قلت أنا همشي ، عندي وجع جبار
أصل من رغيف العيش ، مشلتش المسمار
ولا خدت بالي من كل عقب سجار
ولا بلاش منه ! خليني أقولك :
- مش لاقي أتجوز ، شقة يا ريس
- خدها المستثمرين !
- طب والشعب يتكيس ؟
رفعت المرتبات ، بس دي ملاليم
واللي كان بجنيه ، فجأة بقي بعشرين
قلنا يلا وماله ، تسلم يا نور العين
بس لا مؤاخذة ، كان عندي بس سؤال
هي دي علاوة ؟ ولا ده استهبال ؟!
قالوا لي : اخـــرس ، سيرة الرئيس تتصان
فرجعت من تاني ، شفت العذاب ألوان
ودورت علي أحمد احكيله إيه بيوجع
متعود أشكيله أصله واد مجدع
كان سأل ظابط كان راجل أجدع
قولي يا باشا : مين لينا بيسمع ؟
ليه النظام أطرش ، لا بيجدي ولا ينفع ؟
ولما وصلت البيت ، رحت سألت عليه
ردوا عليا وقالوا : والله مش موجود !
- طب خرج من امتي ؟
- والله مش معدود !
- سألت طب مع مين؟
- قالوا لي مع محمود !!!
محمود ده كان أستاذ بس لبس أزرق*
واسأل عليه زهير لما قال زحمة
ودندنله حلمي قصيدة في مسلسل
وعرفت أصل الحكاية لما قال أزرق
يلا عشان نخلص ، وبرضه مش هخرس
بذمتك بسألك : يا أيها النظام؟
مش كفاية يعني ولا مش حرام ؟
شعب انضرب ، واتحرم ، واتهان !
ويبقي ظالم ! بالذمة ده اسمه كلام ؟
كفاية عليك يا ريس الانتحارين
اللي قصاد الوزارة ماتوا والعين
ومظاهراتنا اللي ملتلك الميادين
فاسمعني بيني وبينك ، وبعيد عن السامعين
ولا اعتبرها فضفضة بين اتنين رايحين
ولا اعتبرني مجرد واحد بس ليك بنصح
لا عدت هطول عليك ، ولا فيهم همدح
وأنا مش بكره مصر ، لأحسن تقول بفضح !
ده أنا ابن مصر ، ولسمها بنضح
أنا بس بترجاااااك ، سبنا .... نفرح
فلتصلبوني في العلن
اسفكوا الدماء
واهدموا المبيت والسكن
شردوني بلا ثمن
وامنعوا عني الطعام
كي ينخر جسدي الوهن
اذبحوا أمي وأبي
وامتهنوا ما لا يمتهن
واختبئوا خلف المدرعات
كجرذ يفوح بالعفن
سأفتح صدري للرصاص
ليستقبلها بلا شجن
لا تحسبوا أنى أخاف
فقد مضي ذاك الزمن
سأذهب بنفسي للكفن
كي تسترد يا وطن
Tags: رسالة-شهيد
يخفضون سقف الطموحات
ونحن له نرفع
يخبئون شمس أحلامنا
وبعزيمتنا
نورها يسطع
يجيدون فن الممكن
وبفن المستحيل نبرع
يقبلون طريق الخضوع
ونحن لا نركع
لوى عنق العدالة
فصرخت حتى أسقطت همزته
وتحركت ألفه لليسار خطوة
، لتشاهد وضاعته
، حقارته
والتصقت بالقاف واو
تشهد علي الفقير ظلماً قوته
كان قائداً وبعدما فعل
، قواد
صار سيادته
قائد ، قاد ، قـ اد ، قـواد
Tags: للأحرف-ثورة
قد يستطيع السلطان ، أن يتحكم في الأحرف ، ويستطيع أن يختار
ما يُكتب وما لا يُكتب ، ويقرر وحده ، ما يُفعل وما لا يُفعل ، لكن قد يتغير كل شئ في لحظة ، وذلك لأن
للأحرف ثورة
« first previous
Page 10 of 13.
next last »
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.