دى سيرته بس لوحدها احساس جميل
بركة تحل لوحدها مالهاش مثيل
حتى النبى قال اللى ما يصليش بخيل
من فينا نفسه يكون بخيل ويا النبى
سيرته الملايكة تحبها تحضر أوام
تسمع قلوب متطمنة بتقول كلام
حتى المثل بيقول لكل كلام مقام
ومفيش مقام فى الدنيا أعلى من النبى
صليت عليه ؟؟؟
حسيت باييه!!!!!؟؟
Tags: التلت-الأسود-من-العلم
مش من حقك
مهما تكون بتشق الصخر عشان ترضيها
تعمى عنيها
مش من حقك
علشان تاخد ايدها لفوق
تلوى ايدها
وانا مروح
ساعات بمشيها مش بركب
ومشواري طويل حبة لكن مبسوط ومش بتعب
بلاقي حاجة في الزحمة
وفي الفرجة علي الدنيا في عيون الناس
ومين زعلان ومين سرحان ومين ماشي كده وخلاص
واروح اشرب عصير مع ناس
مفيش بيننا ولا حاجة
وناس تسألني محتاجة
وناس ملمومة بتزعق
ثواني و متلاقيش حاجة
وحد يقوللي ولعلي
وحد يشوفني يضحكلي
وحد يقوللي وسعللي
وانا معملتوش حاجة
لكن ماشي
وانا ماشي
بحس بإني صوت آلة في غنو الدوشة تعزفها
بكون كومبارس بيعدي في قصة ماشية علي كيفها
يجوز من غيري مش فارقة
لكن فارقة معايا بجد
وكل ما احس بالوحدة
وان في دنيتي ولاحد
أروح مشي
مش بركب
ومش بتعب
وانا صغير
مكانش يهمنى (امتى)
وانا صغير
بقف دايما قصاد (ازاى؟)
وكنت بحب (دلوقتى)
وبكره كل يوم (لسه)
وبزعل لما بسمع (بس)
وقولت لنفسى 100 مرة
اكيد اكبر وأهزم (لأ)
وادينى كبرت
مش عارف
كبرت بسرعة او بشويش
وضاع منى الكلام كله
وكل اللى فضللى (مفيش)
اصحي دوما
يكفي نوما
بكرة احسن
لو تفوق
كن نشيطا
مش عبيطا
كن حويطا
تبقي فوق
والحكاية
م البداية
قول معايا
للي فوق
اعطني قلما وخبزا
ثم امنا وجريدة
وانت تسمع اسم مصري
يمتطي اخبار سعيدة
اعطني وطنا مثقف
لم يلوث او يحرف
والتاريخ لو كان مخرف
يفهم القصة الجديدة
اعطني خبزا يا سيدنا
جوعنا كافر لاوي ايدنا
مات عشان العيش شهيدنا
واحنا لسه ع الحديدة
اعطني أمنا لأني
في انفلاتا غصب عني
كان لي أمنا سجنني
بالقوانين العتيدة
اعطني اعلام صريحا
مش بذيئا او أوبيحا
او يخلي العقل ميحا
يجعل الفاهم بليدا
اعطني وبلاش تخلي
الامل يحبط تمللي
ثورتي تصنيع محلي
والميادين مش بعيدة
اعطني وادعيلي دعوة
اعطني وملكش دعوة
الامال بعتالي دعوة
نفتتح مصر الجديدة
ولسه الدنيا فيها حاجات
وهنقابل كتير حكايات
هنفرح أو هنتألم
ده دورنا ان احنا نتعلم
قصاد الدنيا بنسلم
تسيب جوه القلوب علامات
يا عمر بيجري علي مهله
نصيبك كله تستاهله
وعلمك مهما زاد جاهله
بتتعود مع الأوقات
يا رحلة وأحلي ما فيها
بدون ما اختار بعيش فيها
تسوقني مهما اسوق فيها
مكاني لو مشيت مسافات
يا خطوة تمللي محسوبة
ياسهلة وكلها صعوبة
ده مهما كسبتي مغلوبة
وكل الجاي عدا وفات
سهران والليل سهران جنبي
وبناخد وبندي حكاوي
وحكيتله الجرح اللي ف قلبي
معرفش الليل يبقي مداوي
ملقاش ولا كلمة يقولهالي
واتسحـّب م القعدة وسابني
صحالي الجرح اللي تعبني
وخد مني النوم
واليوم اللي بيبدأ شافني ببكي وموجوع
وصعبت علي الفجر سألني
ايه الموضوع!
فقعدت احكيله وأشرحله
عن قلب القلب زمان راحله
كان اكتر حد بيرتاحله ويحس معاه
بالفرحة اللي تمللي بعيدة وكانت ناسياه
القلب اللي بيبكي ليالي
ضحكتله الدنيا بصوت عالي
كان واصل للنجم العالي
من كتر الشوق
اتعشم في الدنيا زيادة
وفاكرها هتديله سعاده
واتاريه كان واهم كالعاده
ومسيره يفوق
وياريت الدنيا ما ضحكتله وقالتله يدوق
بقي يشبه طير ليلة عيده
واتقابل برصاصة صيده
وواقع من فوق
حدوته وخلصت بجراحي
والجرح اللي ف قلبي وصاحي
كل اما احكيها يزيد ويله
هو انا كان مين قاعد جنبي وعمال بحكيله
بعد محنة بتيجي منحة
حظ كان ميت بيصحي
يعني حملك بيبقا قاسمك
تلقي واحد فيه يقاسمك
حلم طول الوقت خاصمك
يسعا هو للمصالحة
بعد يأس بتيجي فرصة
دي الظروف لو مهما تقسا
اللي خالق مش بينسا
بس كله بالمشيئة
مش بيتأخر دقيقة
ع اللي راكب درجة أولي
واللي راكب ع السبنسة
واللي مش راكب يلاقي
واللي مش حاسب تلاقي ربنا بيوجلده مخرج
يعني مهما الدنيا عاندت وللا عادت ولاضاقت
برضه مهما تضيق بتفرج
واوعا تسأل جه منين
ورث من مطرح لا تعلم
فجأة ييجي يسد دين
ده اللي واخد بالإيدين
بذرة الصبر اللي لازم
طرحها بيكون يقين
كلنا بنقول هتفرج
بس مش عارفين منين
احنا جهلة علم غيب
ترموتر الدنيا .. جيب
حبل دايب بين ايدينا
واحنا مش راضيين نسيب
واما تيجي اللحظة نفلت
وقتها بنقول ...
... .نصيب
تفرق كتير
لما الليالي تحن على القلب الوحيد
وتبتسم له
عمره يبدأ من جديد
و يلاقي حلم بقاله ياما..
بيناديه
ياخد أيديه
والعمر يرجع تاني عيد
تفرق كتير
لما الحنين يوصل بقلبك للسحاب
والشوق ليالي
نارها
أهون مــ الغياب
وتلاقي شمس العمر راجعة..
بتناديك
ويغني قلبك زي ما يقول الكتاب
تفرق كتير
أصل اللي فاضل في الحياة
مبقاش كتير
والثانية ويا حبيب أكيد
بتعدي غير
إحساس بيلغي..
كل أحزانك معاه
والفرق بين الجاي
والفايت كبير
تفرق كتير
ودنيتك تضحك في مشهد؛
مش أخير
والآه تسيب العمر وتغيـَّر مصير
والقلب يرجع للحياة ..
بعد أما مات
جناحاته تاخده للسما
ومحتاج يطير
تفرق كتير
محسوبكم صابر من بدري
ساكن في الحي العشوائي
عضو ف جمعية مش لاقي والصبر جميل
ومواطن بشرب من نيلها والوصل دليل
وادي وصل النور
ودي صورتي ف جمعة هات حقي جوه التحرير
ومواظب علي حب بلادي ومتفائل خير
وبحب جمال عبد الناصر
ورفضت جمال ابن مبارك
وحاربت جمال يوم الاربع وحاربت حمير
لا بخاف من جيش ولا دبابة
وماليش في الخيلة الكدابة
وطابور العيش وسط غلابة خد مني كتير
ووقفت ف لجنات شعبية
وبحب الوحدة الوطنية
وصحابي الفول والطعمية دول اجدع ناس
ووقفت حداد صليت غايب جوه القداس
علي روح الورد اللي مفتح في جناين مصر
وعرفت القاتل والخاين وكلاب القصر
وعرفت كمان ان الدلتا دي علامة نصر
والنيل متوحد فى الاخر رغم الفرعين
وعرفت حقوقي المتباعة
وعرفت اجندة وفزاعة
واكلت الكنتاكي اشاعة
وخلعت رئيس بالخلاعة
وعرفت الفتنة ام بتاعة كت جاية منين
والطلقة اللي ف كتفي دي ميري مش طلقة دين
الدين في كنايس وجوامع
اما اللي بيهتف في الشارع
دول مصريين
« first previous
Page 7 of 9.
next last »
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.