عاش مكسور
ومات مكسور
أصله حَبَس أحلامه فـ سور
وقفل كل طريق للضىّ
فاكر انه كدا بيحميها
من أخطار الزمن الجاىّ
وبعد ما قتل الحلم بايده
كان فاكر لما هيحتاجله فـ مرة هيرجع يلقاه حىّ
قضّى حياته مابين اليأس وبين الخوف
واتنازل عن كل حقوقه لأنه ضعيف
لما الدنيا قالتله اختار
عاش فـ العتمة وساب النور
شاف أحلامه وأحلام غيره وهى بتدبل أدام عينه
ضاعت م الخوف أحلى سنينه
وبعد دا كله
لسه بيحلم
انه يعيش ويموت مستور
كان دايما خايف من بكره
وبيتحسر لما يشوف الناس بتموت ومالهاش ذكرى
وبدال ما يدوّر على حلمه
وبعد صراعه سنين مع نفسه
قرر انه يعيش مستنى
يوم ماهيجى عليه الدور
قرر انه يعيش مكسور
ويموت مكسور ~
فى يوم يمر كأنه يوم
ويوم تحس انه سنة
الوقت عمره ما كان ساعات
الوقت محسوب بالهموم
وساعات بأوقات الهنا
كنت هتجنن وأشوفه
كان واحشنى لون كسوفه
نظرته وبسمة عنيه
لما شوقه يبان عليه
وأنسى كنت هقوله ايه
لما يوم يخطفنى طيفه
نفسك تعيش ازاى
الاختيار بإديك
أصل الحياة ألوان
وف فترة الشِدّة
كل الأصول بتبان
لا ضعيف بيظهر قوى
ولا وحش يبأى جبان
ولا يوم. فى لون هيتوه
فى زحمة الألوان
أبيض دا لون قلبك
لون الصفا ف ودّك
لون فرحتك بحياة
مرسومة على أدك
والأحمر أصله الدم
انك تشيل الهم
بس ساعات يتشاف
لون ورد على خدك
وأزرق دا لون السما
يعنى أمل وطموح
يشبه نقاء الروح
لو يوم تكون مجروح
تلاقيه دفا لقلبك
والنبتة لونها أخضر
ودا منبع الأسرار
أصل الحياة والموت
لون عشق للملكوت
ممكن بورقة توت
يستُر ف وَضَح النهار
تشوفه عين ترتاح
وتحبه ويحبك
واسود دا لون الحزن
ودا لون لابد منّه
يوم فرح يوم أحزان
بنخافه مع انّه
دا سيد الألوان
أصل الحياة لوحة
عايشين بنرسمها
فى حاجات بنبنيها
وحاجات بنهدمها
أوقات كتير للفرح
وزيهم للجرح
وساعات تبان غامضة
وساعات بنفهمها
ودا كله حسب اللون
ارسم لنفسك حياة
واختارلها الألوان
شوف اللى هيناسبك
واللى هيضمنلك
انك تعيش انسان
وابأى افتكر دايما
إن الحياة ألوان :)
أحياناً نَحتاج لأن نَفرح فقط لنَشعر أننا مازلنا أحْياء~
Ahmed Faiadعارف انت لما توصل مرحلة حب الحياة
وتحس انه لكل انسان فــ الوجود
حق انه يعيش حياة
يبأى نفسك تمشى فــ الشارع تطبطب علـ الغلابة الموجوعين
يبأى نفسك لو تخفف عن قلوب تعبت كتير
وجع السنين
وجع الأنين
وجع الحنين
وجع قلوب ناس قالوا عايشة وهما أصلا ميّتين
اللى قتلهم فقرهم
واللى قتلهم حلمهم
واللى قتلهم صبرهم
واللى قتلهم فرحة ضاعت من زمان كانت أساسا حقهم
لما حسوا انهم لو فِرحوا يتاخدوا اشتباه
تواسى ناس مايقدروش يوم يشتروا علبة دوا
وناس كتير خايفين ليفتحوا بقهم يتنفسوا
يلاقوا فواتير فيها أتمان الهوا
ناس عارفة معنى انك تخاف من أى حاجة وأى حد :(
ناس ياما ناموا ودمعهم مـ الحزن سال على كل خد
عارف انت الناس دى
فعلا تستحق الطبطبة
مع بسمة حلوة ف وشهم :)
يااه لو تحسسهم بإنك رغم كل اللى شافوه م الدنيا دى بتحبهم
هيحسوا ان الدنيا لسه فيها علشانهم أمل
ان الحياة من حقهم
هتصحى فيهم حلمهم
اللى من اليأس اتقتل
وهيرجعوا للدنيا تانى من جديد
بس الأكيد
لو ماتوا هتكون ابتسامتك هى أجمل حاجة ليهم فى الحياة
وساعتها بس هتحس معنى انك تكون انسان جميل
وصل جمال قلبه وروحه لمنتهاه ^_^
عَارفة أنا نِفسى فى ايه
عارفة أنا عايش حياتى
ليل نهار بحلم بإيه
نفسى أضُمك بين ايديا
وأحضُنك
وألفّ بيكى الكون بحاله
طَبْ وماله
خايفة ليه
خايفة لـ الناس يعرفوا
اللى ياما شافوه فـ عنيا
طَبْ ياريت
نفسى كل الدنيا تعرف
انك انتى بقيتى ليا
ان أنا اخترتك حَلالى
ان حلم حياتى هو
انى اشوف منك عِيالى
وان حلم ايديا تلمس
فـ الحلال مرة ايديكى
ان عينى حالفة ماتشوفش الحياة إلا بعنيكى
عارفة أنا لو فيا قوة
قوتى دى حماية ليكى
والحَنان ف حياتى لمّا
تحسى دايما ان أنا حنين عليكى
نفسى أصرخ ف الوجود
نفسى ييجى اليوم
وكل الدنيا تعرف
ان حبك عندى فاق كل الحدود
وصل لحالة غريبة أبعد مــ الحياة
حالة أبعد من حياتى ومنتهاه
حالة أقرب للخلود ♥
معلش ثوانى لو تسمح
أنا ليا حقيقى طلب عندك
تعرف تفرح
ممكن تضحك
ممكن تَتَفاءل من فضلك :)
الدنيا أكيد صعبة كفاية
ممكن تأذى وممكن تجرح
لكن مع كل الصعوبات دى
ممكن تواجهها بضحكاية
لو كل الدنيا معانداك
بلاش انت تكون واقف ضدك
تعرف تضحك وقت الشدة
تعرف تثبت عــ الضحكة ماتضعفش ف وقت الرِدّة
ممكن تدّى الأحزان ضهرك
وتقابل يومك بالبسمة
ياسلام لو جربنا الفرحة
ياسلام لو مرة نلاقى الناس
أفراحهم بينهم متقاسمة
وقلوبهم راضية ومتسامحة
هنلاقى الدنيا بأت أسهل
حياتنا أكيد هتكون أجمل
خَلّى شِعارك دايما
افرح
اياك تزعل
وان يوم قابلك واحد زعلان
قوله أنا عندى الحل السحرى لكل مشاكلك
تعرف تفرح
ممكن تضحك :)
من بين كُل الدنيا اخترتِك
تبأى حياتى وكل ما ليا
تسكنى قلبى وضَىّ عنيا
وتكونى شريكة أحلامى
فرحة عمرى وهنا أيامى
والصعب هيصغر أدامى
طول ما ايديكى ماسكة ايديا
تعرف يبأى شِعارك دايماً
أنا آخر واحد فـ العالم
ممكن ييأس أو ينهار :)
« ; premier précédent
Page 3 de 7.
suivant dernier » ;
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.