- قالت الدنيا للولد في الفصل
يا تعيش بِتكتب ورايا
في الحصة يا تعيشها
إنسى ان فيه في الفصل سبورة
- قال المصور للِّي جاب كاميرا
يا تعيش بتاخُد صُور
للقِصة يا تعيشها
الكادر دايماً أغلى م الصورة
يا دُنيا انا بَكْتب
للجاي بَعْدِيّا
وانا جاي بَعْدِي ألوف
وان كنت بِاخُد صِوَر
للقِصة مش ليّا
ف انا نفسي غيري يشوف
صدقني أنا كان نفسي أتعلّق.. ف حاجات يامَا
وأعيش إحساس إن أنا فعلاً من غِيرها هَمُوت
أنا أعرف أعيش
مِن غير ما أحتاج إني أقرا الوقت
من غير ولا واحد.. م اللي أنا أعرفهم دلوقت
Tag: المانيفستو-تفرانيل-زهد-وحدة
تفرانيل 50"
أنا بفضل دايما للآخر
ف جيمات الكونكان والشايب
و ف كشف الحاضر والغايب
وف حجز شقق مصيف بلطيم
أنا آخر تايب في اصحابي
وآخرهم ف الصلا ف التسليم
وف دور المدرسه في التطعيم
وفي وقت السين
أنا آخر جيم
أنا جرح قديم...كان متغطي
إكمني مشتي ولابس كم
سبتني الدنيا بستين أم
وسبتلها ميت مِلّه ودين
ولحد ماتميت ست سنين
أنا كنت بحب البني آدمين
وكرهت الناس من بعديها
علشان نسّوني أنا أصلاً مين
مش فاكر إمتى حقيقي بدأت
إنما فيه فتره فاكرها طشاش
كان فنجان قهوتي مابيفضاش
وبكلم ربنا طول الوقت
عمري ماصدقت بنات غير ريم
ويمكن دلوقتي ما اصدقهاش
آخر مره
شفتها فيها
كانت تقريبا بتعزل
و كان فيه سواق تاكسي منزل
ف شنط ناس حتحل مكانها
ووشوش بني آدمين معرفهاش
أنا ريم يمكن كانت قدي
أيامها... لكن دلوقتي أصغر
عارفه إن أنا يوميا بكبر ؟
وبعجز إكمني مابنساش
أنا فاكر أيام بالميللي
أنا فاكر أيام بالتفصيل
أنا فاكر يوم دفنة أختي
حتصدقي..؟ أكتر مافاكرها
وساعات بنسي ف ليله كبيرها
أنا فاكر شقة قصرالنيل
ومش فاكر حد من السكان
من صغري وعمري مابنسي مكان
أنا أصلاً فاكر بيت شادي
مع إني مازورتوش غير مره
بأمارة فيه برواز بره
كان جواه صورته ف إعدادي
كان لسه ساعتها طالعله شنب
ونا حاسس إني طلعلي أتب
من تقل الشيله و م التفكير
معلش أنا آسف برغي كتير
وبسف ف وقتك وف وقتي
أنا حاسس بدماغي بتتقل
أنا نفسي أنام
أنا عاوز أروّح دلوقتي
متشكر جداً ع الجلسه
حنكمل إمتى علاج طيب ؟
لازم حنشوف بعض قريب
أنا ماشي...
سلام
التاريخ ضمن الغنايم .. وبيكتبه الكسبان
مصطفى إبراهيمالماضي بيمضي حضور يوميا في الكشوفات..
مين قال امبارح مات ؟!
أنا أحسن واحد يقدر يقنعك تحكى ... و ما بيحكيش
انا أحسن واحد يقدر يقنعك تبكى ... و ما بيبكيش
أنا أحسن واحد يقنعك تفرح
و أحسن واحد يقنعك تجرح
أنا أحسن واحد ميت
يقدر يقنعك ...
تعيش
لملم خسايرك بعد ما تخسر
من بنت فعلاً مش قصدها تأذيك
إنوى اللى بعديها ... تاخد زمن أقصر
من إنه يعمل ذكرى بعدها تبكيك
فرق السرعات جوا الدايرة
بينك و ما بين كل الماشيين
هو اللى هيقدر يضمنلك
إن انتا تقابل ناس تانيين
يا خالق كل شئ ناقص .. كمالته معاك
يا شايل م الحاجات حتة .. بنترجاك
بحق المشهد الكامل
و اسمك اللى أنا عرفته
تسيب اللى يكفينا
و تكفينا بما سبته
ما تحوجناش
لجاى مجاش
و ترضينا بما جبته
هتلقوا ع الوطن مكتوب
((لا يؤخذ عن طريق الفم))
يا إما تشمَّروا الأكمام
عشان تاخدوه
يا إما توطّوا على قُدَّام
عشان تاخدوه
بنى هذا الوطن .. و بنوه
« prima precedente
Pagina 8 di 12.
prossimo ultimo »
Data privacy
Imprint
Contact
Diese Website verwendet Cookies, um Ihnen die bestmögliche Funktionalität bieten zu können.